2010年2月5日…暫時係我喺2010年過得最有意義的一日，好想將盈盈小朋友呢個故事記低…
盈盈喺一場火警意外導致佢變成一個身體有殘缺嘅小朋友，喺嗰次意外因為佢daddy & mammy 將佢同佢哥哥獨自留喺屋企而壤成意外，而細剛就係當日同其他消防員救左佢同佢哥哥。當時嘅盈盈只有2歲，但佢身上多處皮膚嚴重燒傷…佢被救出嘅時候已經昏迷。細剛話當時救完佢之後盈盈一直都喺深切治療部，因為消防員身份關係，佢唔可以去醫院探盈盈，但佢都有每日睇報紙去追查盈盈既情況。事隔2年，細剛突然接到醫院嘅電話，醫院話盈盈經過2年黎嘅治療可以返屋企喇..所以醫院幫佢搞左個farewell party，想邀請當日救佢嘅消防員一齊慶祝，因為呢個party，細剛先可以再見返盈盈。
喺盈盈返屋企住既呢段日子，細剛都keep住搵佢，直至今日，喺細剛安排下，我同老公,肥b,阿峰,佩儀一行6人，帶左盈盈去迪士尼玩，當然呢次係盈盈嘅第一次啦!
呢個小朋友令我今日體會到好多野，因為佢嘅堅強，佢嘅純真，令我好感動! 希望上天可以比佢活得更好!
啱啱過咗嘅WEEKEND…同老公同埋一班BEST FRIENDS 去左梅窩露營! 呢次係我人生的第2次露營，感覺比起第一次同老爺奶奶去無咁辛苦 ^_^，可能因為今次坐車唔駛坐得太耐…! 其實自己都唔係好愛露營呢D咁OUTDOOR 既活動，因為實在覺得太污糟同太多蛇虫鼠蟻喇…去嘅原因都係為咗陪老公去呢….(好偉大 ^^)…唉..不過呢次去露營用左好多錢呢買GEAR呢…雖然唔洗自己比錢買..但都唔係好捨得用咁多錢去買露營用品….希望自己會慢慢愛上呢個活動..去多幾次..感覺抵D!!!
上個月尾11月28-12月4日,公司突然要我去日本上TRAINING, 開頭都有D驚, 因為係一個人去,但好彩最後有個同事陪我去,不過同事就係去旅行,我就去做野…但都總好過一個人嘅! 喺日本嗰幾日,不停KEEP住同細榮SMS,大家都唔係好習慣分開咗咁…佢話一個人喺屋企好靜好寂寞…無我喺度”哦”佢..佢唔慣呀..^^…去完日本返到黎…大家嘅感情又增進咗喇! 不過返到香港又感冒喇…浩賢仲確疹左有豬流感,我都以為自己有事..好彩我唔係咋,但都病足一個禮拜, 由去日本到宜家病…真係攰到死, 之後仲有排忙,都唔知幾時先有得抖下…!
今日又係一年一度嘅澳門格蘭披治大賽…每年呢個時候我就會諗起DADDY 嘅威水史喇! 記得由我4歲開始我就會每年都要比DADDY逼我一早起身幫佢錄賽車，仲要分賽事,分帶CUT廣告=.=…因為佢想睇返佢自己賽車嘅片段，講真…小時候嘅我當然想玩玩具，瞓耐D啦….但大過咗…我就覺得有呢個DADDY都幾威水, 因為都無幾多個香港人可以喺呢條咁難嘅跑道上得過冠軍…不過只係風光一時…^^…而家都無人知佢係乜水啦! 但我有呢個老豆都真係幾驕傲喇…只少佢培養咗我睇賽車嘅興趣, 令我每年都記得童年時幫佢錄賽車嘅回憶! 直到今日…雖然大家已經唔係住埋一齊…但我同老豆都仲係一齊睇緊賽車呢…今晚仲同佢一齊打邊爐…感覺良好…^^!!!
唔經唔覺阿婆已經離開咗我地一年喇…今日我地一家人全部都上山悼念佢! 見到佢墓碑上嘅相…令我回億起喺上年佢走嘅時候每一幕嘅情景，真係好唔捨得…好掛住佢! 當舅父,舅母,阿哥祈禱嘅時候，我D眼淚不停咁流，忍唔到! 喺呢一年裡面只可以偶爾喺發夢嘅時候見到佢，有時睇返佢D相都忍唔住會一路睇一路喊，唔知阿婆宜家點呢? 如果真係可以喺我死嘅一日重見阿婆….真的死而無憾了…!
喺呢一年裡面，我地屋企大家都繼續互相關心，不負阿婆嘅遺願….希望大家將阿婆愛護屋企嘅精神一路延續…..
2009年10月12-18日..就係我同老公去HONEYMOON既日子喇…馬爾代夫呢個地方真係好靚，老公真係無揀錯地方! 雖然去到無潛水，好HEA咁過左5日…但呢5日真係真正咁放假，我從未試過咁輕鬆，咁嘆架…我地2個真真正正咁達到HONEYMOON既意義…好SWEET呀…^^! 我覺得喺呢個HONEYMOON最難忘嘅都係見到一個好特別嘅日落，再加埋無敵靚海灘…真係好浪漫呀! 有機會的話..我地一定會去多次架! 去完HONEYMOON…又好想再去第2度旅行喇…下一站會唔會係北海道呢??
結左婚唔經唔覺已經2個月有多喇,時間過得真係快，每一日我都過得好開心，雖然有時做野唔開心或者返夜返得好辛苦，但係一諗到我老婆，我就會快快手，拿拿聲搞掂D野快D走，一返到去我見到佢就咩唔開心，咩辛苦都冇晒．．．點解呢？我既三十歲真係估唔到老婆會整個蛋糕比我同埋一份好有心思既禮物．．多謝你（老婆）！！
終於都去完Honeymoon喇，我好開心呀，多謝老婆陪我去玩啦，我覺得我地冇揀錯地方，呢個地方真係好靚好舒服，成個旅行真係好輕鬆好好玩．．我唔會忘記o係馬爾代夫既事．．睇返D相我真係好掛住o個個沙灘，魚，日落啦．．．我一定會再去架，不過下次去我一定唔搭馬航，呢班機真係驚心動魄，令我呢個Honeymoon有D唔完美，下次我會選擇星航．．
唔知我地下個目的地會係邊度呢？？
擒晚同老公慶祝佢30歲的生日，對女人黎講30歲係人生嘅另一個轉變…轉變係怕老，怕皺紋, 怕無人要! 哈..但對男人黎講,30歲先開始踏入佢地嘅事業高峰期，為咗隆重其事細榮的30歲，我用左一個月嘅時間去諗點樣同佢慶祝好，最後我去整咗一個有30字樣嘅蛋糕同一餐燭光晚餐送比佢! 而今年嘅禮物，係有史以來最平同最有心思嘅一份禮物，呢份禮物係一本喺台灣印嘅相集，裡面記載左我地由相識到結婚嘅片段! 送比老公嘅時候，我諗住佢會感動到喊，點知佢話係有少少想喊但唔會比我見到嘅=.=! 哈..都好彩，佢好滿意今年嘅生日驚喜，唔知到我30歲嘅時候佢又會點樣同我慶祝呢?
咁快就結左婚一個月喇…真係好開心呢! 擒晚發夢見到阿婆呀, 終於都見到佢，好掛住佢呀! 但我已經唔記得咗個夢係做d乜喇! 希望阿婆個墓碑快d整好…咁就可以去睇佢喇!
擒晚老公煮左飯比我食呀..好開心…，呢次係我地住埋一齊以嚟第一次煮飯! 話得第一次煮飯，當然唔會十全十美啦..哈…因為老公打爛咗隻碟呀…，真係食嘢唔做嘢…做嘢打爛嘢…不過佢又真係煮得好好味嘅!!
等咗一個月…終於喺我地結婚一個月呢個日子可以confirm去到馬爾代夫喇 ^^! 好期待我地呢個honeymoon….希望連呢樣都可以順順利利..為我地新婚之喜畫上完美嘅句號啦!!
終於都好順利o係8月15日完成我地嘅婚禮喇….原來喺結婚嗰日真係好開心架…嗰種開心係形容唔到嘅，同平時嘅開心好唔同! 婚禮出奇地順利，天氣仲好好添呀..真係要感謝神賜比我一個難忘嘅婚禮! 多謝各位親戚朋友幫手!
結婚當日全日都過得好快咁，辛苦咗一年去籌備，原來都係好值得嘅，多謝老公同所有親戚朋友比咗個好好嘅回憶我! 特別係老公好大膽咁唱咗隻”就是愛你”比我聽…好感動..!!原本諗好咗有d嘢喺台上到講,但喊到唔記得晒喇,只係講左幾句多謝就唔知講咩喇…不過我都想趁宜家記得嘅時候記返低我想講嘅嘢….
我想多謝daddy, mammy嘅呵護，養育之恩，雖然仲未報答到你地…但我仍會盡力去照顧你地!! 多謝家姐,阿哥對我一直以來嘅照顧，特別係家姐..一直陪住我成長…我地兩姊妹一齊生活嘅經歷同感情，無人會感受到我地嘅感情有幾深同好..! 多謝阿哥對屋企嘅付出! 多謝阿婆，我有少少遺憾阿婆出席唔到我呢個婚禮，好記得…阿婆最後喺病床上面同我講得最清楚嘅最後一句說話就係問我幾時結婚，我當時只係可以答佢出年結喇…如果佢見到我結婚嘅話，我一定會同佢講，我嫁咗一個對我好好嘅人，唔駛擔心! 多謝老公，呢幾年好照顧我，估唔到呢個肥仔有時都好有心思，好錫我…多謝佢願意擔起我呢個野蠻女友..你令我覺得好幸福!
呢d就係我一直諗住喺結婚當日要講嘅嘢…如果喺結婚當日要我對住咁多人講…我諗我一定喊到講唔到!
結完婚已經一個禮拜喇，感覺好輕鬆，無晒壓力，好開心．．．黎緊就係plan去honeymoon喇…向馬爾代夫出發….^^!